Hetupaccayo, ārammaṇapaccayo,
adhipatipaccayo, anantarapaccayo,
samanantarapaccayo, sahajātapaccayo,
aññamaññapaccayo, nissayapaccayo,
upanissayapaccayo, purejātapaccayo,
pacchājātapaccayo, āsevanapaccayo,
kammapaccayo, vipākapaccayo,
āhārapaccayo, indriyapaccayo,
jhānapaccayo, maggapaccayo,
sampayuttapaccayo, vippayuttapaccayo,
atthipaccayo, natthipaccayo,
vigatapaccayo, avigatapaccayoti.
Hetū hetusampayuttakānaṁ dhammānaṁ, rūpānaṁ, hetupaccayena paccayo.
Rūpāyatanaṁ cakkhuviññāṇadhātuyā, dhammānaṁ, ārammaṇapaccayena paccayo.
Saddāyatanaṁ sotaviññāṇadhātuyā, dhammānaṁ, ārammaṇapaccayena paccayo.
Gandhāyatanaṁ ghānaviññāṇadhātuyā, dhammānaṁ, ārammaṇapaccayena paccayo.
Rasāyatanaṁ jivhāviññāṇadhātuyā, dhammānaṁ, ārammaṇapaccayena paccayo.
Phoṭṭhabbāyatanaṁ kāyaviññāṇadhātuyā, dhammānaṁ, ārammaṇapaccayena paccayo.
Rūpāyatanaṁ saddāyatanaṁ gandhāyatanaṁ, rasāyatanaṁ phoṭṭhabbāyatanaṁ manodhātuyā, dhammānaṁ, ārammaṇapaccayena paccayo.
Sabbe dhammā manoviññāṇadhātuyā, dhammānaṁ, ārammaṇapaccayena paccayo.
Yaṁ yaṁ dhammaṁ ārabbha ye ye dhammā uppajjanti, cittacetasikā dhammā, te te dhammā tesaṁ tesaṁ dhammānaṁ, ārammaṇapaccayena paccayo.
Chandādhipati chandasampayuttakānaṁ dhammānaṁ, rūpānaṁ, adhipatipaccayena paccayo.
Vīriyādhipati vīriyasampayuttakānaṁ dhammānaṁ, rūpānaṁ, adhipatipaccayena paccayo.
Cittādhipati cittasampayuttakānaṁ dhammānaṁ, rūpānaṁ, adhipatipaccayena paccayo.
Vīmaṁsādhipati vīmaṁsasampayuttakānaṁ dhammānaṁ, rūpānaṁ, adhipatipaccayena paccayo.
Yaṁ yaṁ dhammaṁ garuṁ katvā, ye ye dhammā uppajjanti, cittacetasikā dhammā, te te dhammā tesaṁ tesaṁ dhammānaṁ, adhipatipaccayena paccayo.
Cakkhuviññāṇadhātu taṁsampayuttakā ca dhammā manodhātuyā dhammānaṁ, anantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, anantarapaccayena paccayo.
Sotaviññāṇadhātu taṁsampayuttakā ca dhammā manodhātuyā dhammānaṁ, anantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, anantarapaccayena paccayo.
Ghānaviññāṇadhātu taṁsampayuttakā ca dhammā manodhātuyā dhammānaṁ, anantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, anantarapaccayena paccayo.
Jivhāviññāṇadhātu taṁsampayuttakā ca dhammā manodhātuyā dhammānaṁ, anantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, anantarapaccayena paccayo.
Kāyaviññāṇadhātu taṁsampayuttakā ca dhammā manodhātuyā dhammānaṁ, anantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, anantarapaccayena paccayo.
Purimā purimā kusalā dhammā pacchimānaṁ pacchimānaṁ kusalānaṁ dhammānaṁ, anantarapaccayena paccayo.
Purimā purimā kusalā dhammā pacchimānaṁ pacchimānaṁ abyākatānaṁ dhammānaṁ, anantarapaccayena paccayo.
Purimā purimā akusalā dhammā pacchimānaṁ pacchimānaṁ akusalānaṁ dhammānaṁ, anantarapaccayena paccayo.
Purimā purimā akusalā dhammā pacchimānaṁ pacchimānaṁ abyākatānaṁ dhammānaṁ, anantarapaccayena paccayo.
Purimā purimā abyākatā dhammā pacchimānaṁ pacchimānaṁ abyākatānaṁ dhammānaṁ, anantarapaccayena paccayo.
Purimā purimā abyākatā dhammā pacchimānaṁ pacchimānaṁ kusalānaṁ dhammānaṁ, anantarapaccayena paccayo.
Purimā purimā abyākatā dhammā pacchimānaṁ pacchimānaṁ akusalānaṁ dhammānaṁ, anantarapaccayena paccayo.
Yesaṁ yesaṁ dhammānaṁ anantarā ye ye dhammā uppajjanti cittacetasikā dhammā, te te dhammā tesaṁ tesaṁ dhammānaṁ, anantarapaccayena paccayo.
Cakkhuviññāṇadhātu taṁsampayuttakā ca dhammā manodhātuyā dhammānaṁ, samanantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, samanantarapaccayena paccayo.
Sotaviññāṇadhātu taṁsampayuttakā ca dhammā manodhātuyā dhammānaṁ, samanantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, samanantarapaccayena paccayo.
Ghāṇaviññāṇadhātu taṁsampayuttakā ca dhammā manodhātuyā dhammānaṁ, samanantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, samanantarapaccayena paccayo.
Jivhāviññāṇadhātu taṁsampayuttakā ca dhammā manodhātuyā dhammānaṁ, samanantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, samanantarapaccayena paccayo.
Kāyaviññāṇadhātu taṁsampayuttakā ca dhammā manodhātuyā dhammānaṁ, samanantarapaccayena paccayo.
Manodhātu taṁsampayuttakā ca dhammā manoviññāṇadhātuyā dhammānaṁ, samanantarapaccayena paccayo.
Purimā purimā kusalā dhammā pacchimānaṁ pacchimānaṁ kusalānaṁ dhammānaṁ, samanantarapaccayena paccayo.
Purimā purimā kusalā dhammā pacchimānaṁ pacchimānaṁ abyākatānaṁ dhammānaṁ, samanantarapaccayena paccayo.
Purimā purimā akusalā dhammā pacchimānaṁ pacchimānaṁ akusalānaṁ dhammānaṁ, samanantarapaccayena paccayo.
Purimā purimā akusalā dhammā pacchimānaṁ pacchimānaṁ abyākatānaṁ dhammānaṁ, samanantarapaccayena paccayo.
Purimā purimā abyākatā dhammā pacchimānaṁ pacchimānaṁ abyākatānaṁ dhammānaṁ, samanantarapaccayena paccayo.
Purimā purimā abyākatā dhammā pacchimānaṁ pacchimānaṁ kusalānaṁ dhammānaṁ, samanantarapaccayena paccayo.
Purimā purimā abyākatā dhammā pacchimānaṁ pacchimānaṁ akusalānaṁ dhammānaṁ, samanantarapaccayena paccayo.
Yesaṁ yesaṁ dhammānaṁ samanantarā ye ye dhammā uppajjanti cittacetasikā dhammā, te te dhammā tesaṁ tesaṁ dhammānaṁ, samanantarapaccayena paccayo.
Cattāro khandhā arūpino aññamaññaṁ, sahajātapaccayena paccayo.
Cattāro mahābhūtā aññamaññaṁ, sahajātapaccayena paccayo.
Okkantikkhaṇe nāmarūpaṁ aññamaññaṁ, sahajātapaccayena paccayo.
Cittacetasikā dhammā cittasamuṭṭhānānaṁ rūpānaṁ, sahajātapaccayena paccayo.
Mahābhūtā upādārūpānaṁ, sahajātapaccayena paccayo.
Rūpino dhammā arūpīnaṁ dhammānaṁ kiñci kāle, sahajātapaccayena paccayo.
Kiñci kāle na sahajātapaccayena paccayo.
Cattāro khandhā arūpino, aññamaññapaccayena paccayo.
Cattāro mahābhūtā, aññamaññapaccayena paccayo.
Okkantikkhaṇe nāmarūpaṁ, aññamaññapaccayena paccayo.
Cattāro khandhā arūpino aññamaññaṁ, nissayapaccayena paccayo.
Cattāro mahābhūtā aññamaññaṁ, nissayapaccayena paccayo.
Okkantikkhaṇe nāmarūpaṁ aññamaññaṁ, nissayapaccayena paccayo.
Cittacetasikā dhammā cittasamuṭṭhānānaṁ rūpānaṁ, nissayapaccayena paccayo.
Mahābhūtā upādārūpānaṁ, nissayapaccayena paccayo.
Cakkhāyatanaṁ cakkhuviññāṇadhātuyā dhammānaṁ, nissayapaccayena paccayo.
Sotāyatanaṁ sotaviññāṇadhātuyā dhammānaṁ, nissayapaccayena paccayo.
Ghānāyatanaṁ ghānaviññāṇadhātuyā dhammānaṁ, nissayapaccayena paccayo.
Jivhāyatanaṁ jivhāviññāṇadhātuyā dhammānaṁ, nissayapaccayena paccayo.
Kāyāyatanaṁ kāyaviññāṇadhātuyā dhammānaṁ, nissayapaccayena paccayo.
Yaṁ rūpaṁ nissāya manodhātu ca manoviññāṇadhātu ca vattanti, taṁ rūpaṁ manodhātuyā ca manoviññāṇadhātuyā ca dhammānaṁ, nissayapaccayena paccayo.
Purimā purimā kusalā dhammā pacchimānaṁ pacchimānaṁ kusalānaṁ dhammānaṁ, upanissayapaccayena paccayo.
Purimā purimā kusalā dhammā pacchimānaṁ pacchimānaṁ akusalānaṁ dhammānaṁ kesañci, upanissayapaccayena paccayo.
Purimā purimā kusalā dhammā pacchimānaṁ pacchimānaṁ abyākatānaṁ dhammānaṁ, upanissayapaccayena paccayo.
Purimā purimā akusalā dhammā pacchimānaṁ pacchimānaṁ akusalānaṁ dhammānaṁ, upanissayapaccayena paccayo.
Purimā purimā akusalā dhammā pacchimānaṁ pacchimānaṁ kusalānaṁ dhammānaṁ kesañci, upanissayapaccayena paccayo.
Purimā purimā akusalā dhammā pacchimānaṁ pacchimānaṁ abyākatānaṁ dhammānaṁ, upanissayapaccayena paccayo.
Purimā purimā abyākatā dhammā pacchimānaṁ pacchimānaṁ abyākatānaṁ dhammānaṁ, upanissayapaccayena paccayo.
Purimā purimā abyākatā dhammā pacchimānaṁ pacchimānaṁ kusalānaṁ dhammānaṁ, upanissayapaccayena paccayo.
Purimā purimā abyākatā dhammā pacchimānaṁ pacchimānaṁ akusalānaṁ dhammānaṁ, upanissayapaccayena paccayo.
Utubhojanampi upanissayapaccayena paccayo.
Puggalopi upanissayapaccayena paccayo.
Senāsanampi upanissayapaccayena paccayo.
Cakkhāyatanaṁ cakkhuviññāṇadhātuyā dhammānaṁ, purejātapaccayena paccayo.
Sotāyatanaṁ sotaviññāṇadhātuyā dhammānaṁ, purejātapaccayena paccayo.
Ghānāyatanaṁ ghānaviññāṇadhātuyā dhammānaṁ, purejātapaccayena paccayo.
Jivhāyatanaṁ jivhāviññāṇadhātuyā dhammānaṁ, purejātapaccayena paccayo.
Kāyāyatanaṁ kāyaviññāṇadhātuyā dhammānaṁ, purejātapaccayena paccayo.
Rūpāyatanaṁ cakkhuviññāṇadhātuyā dhammānaṁ, purejātapaccayena paccayo.
Saddāyatanaṁ sotaviññāṇadhātuyā dhammānaṁ, purejātapaccayena paccayo.
Gandhāyatanaṁ ghānaviññāṇadhātuyā dhammānaṁ, purejātapaccayena paccayo.
Rasāyatanaṁ jivhāviññāṇadhātuyā dhammānaṁ, purejātapaccayena paccayo.
Phoṭṭhabbāyatanaṁ kāyaviññāṇadhātuyā dhammānaṁ, purejātapaccayena paccayo.
Rūpāyatanaṁ saddāyatanaṁ gandhāyatanaṁ, rasāyatanaṁ phoṭṭhabbāyatanaṁ manodhātuyā dhammānaṁ, purejātapaccayena paccayo.
Yaṁ rūpaṁ nissāya manodhātu ca manoviññāṇadhātu ca vattanti, taṁ rūpaṁ manodhātuyā dhammānaṁ, purejātapaccayena paccayo.
Manoviññāṇadhātuyā dhammānaṁ kiñci kāle, purejātapaccayena paccayo.
Kiñci kāle na purejātapaccayena paccayo.
Pacchājātā cittacetasikā dhammā purejātassa imassa kāyassa, pacchājātapaccayena paccayo.
Purimā purimā kusalā dhammā pacchimānaṁ pacchimānaṁ kusalānaṁ dhammānaṁ, āsevanapaccayena paccayo.
Purimā purimā akusalā dhammā pacchimānaṁ pacchimānaṁ akusalānaṁ dhammānaṁ, āsevanapaccayena paccayo.
Purimā purimā kiriyābyākatā dhammā pacchimānaṁ pacchimānaṁ kiriyābyākatānaṁ dhammānaṁ, āsevanapaccayena paccayo.
Kusalākusalaṁ kammaṁ vipākānaṁ khandhānaṁ kaṭattā ca rūpānaṁ, kammapaccayena paccayo.
Cetanā sampayuttakānaṁ dhammānaṁ, rūpānaṁ, kammapaccayena paccayo.
Vipākā cattāro khandhā arūpino aññamaññaṁ, vipākapaccayena paccayo.
Kabaḷīkāro āhāro imassa kāyassa, āhārapaccayena paccayo.
Arūpino āhārā sampayuttakānaṁ dhammānaṁ, rūpānaṁ, āhārapaccayena paccayo.
Cakkhundriyaṁ cakkhuviññāṇadhātuyā dhammānaṁ, indriyapaccayena paccayo.
Sotindriyaṁ sotaviññāṇadhātuyā dhammānaṁ, indriyapaccayena paccayo.
Ghānindriyaṁ ghānaviññāṇadhātuyā dhammānaṁ, indriyapaccayena paccayo.
Jivhindriyaṁ jivhāviññāṇadhātuyā dhammānaṁ, indriyapaccayena paccayo.
Kāyindriyaṁ kāyaviññāṇadhātuyā dhammānaṁ, indriyapaccayena paccayo.
Rūpajīvitindriyaṁ kaṭattārūpānaṁ, indriyapaccayena paccayo.
Arūpino indriyā sampayuttakānaṁ dhammānaṁ, rūpānaṁ, indriyapaccayena paccayo.
Jhānaṅgāni jhānasampayuttakānaṁ dhammānaṁ, rūpānaṁ, jhānapaccayena paccayo.
Maggaṅgāni maggasampayuttakānaṁ dhammānaṁ, rūpānaṁ, maggapaccayena paccayo.
Cattāro khandhā arūpino aññamaññaṁ, sampayuttapaccayena paccayo.
Rūpino dhammā arūpīnaṁ dhammānaṁ, vippayuttapaccayena paccayo.
Arūpino dhammā rūpīnaṁ dhammānaṁ, vippayuttapaccayena paccayo.
Cattāro khandhā arūpino aññamaññaṁ, atthipaccayena paccayo.
Cattāro mahābhūtā aññamaññaṁ, atthipaccayena paccayo.
Okkantikkhaṇe nāmarūpaṁ aññamaññaṁ, atthipaccayena paccayo.
Cittacetasikā dhammā cittasamuṭṭhānānaṁ rūpānaṁ, atthipaccayena paccayo.
Mahābhūtā upādārūpānaṁ, atthipaccayena paccayo.
Cakkhāyatanaṁ cakkhuviññāṇadhātuyā dhammānaṁ, atthipaccayena paccayo.
Sotāyatanaṁ sotaviññāṇadhātuyā dhammānaṁ, atthipaccayena paccayo.
Ghānāyatanaṁ ghānaviññāṇadhātuyā dhammānaṁ, atthipaccayena paccayo.
Jivhāyatanaṁ jivhāviññāṇadhātuyā dhammānaṁ, atthipaccayena paccayo.
Kāyāyatanaṁ kāyaviññāṇadhātuyā dhammānaṁ, atthipaccayena paccayo.
Rūpāyatanaṁ cakkhuviññāṇadhātuyā, dhammānaṁ, atthipaccayena paccayo.
Saddāyatanaṁ sotaviññāṇadhātuyā, dhammānaṁ, atthipaccayena paccayo.
Gandhāyatanaṁ ghānaviññāṇadhātuyā, dhammānaṁ, atthipaccayena paccayo.
Rasāyatanaṁ jivhāviññāṇadhātuyā, dhammānaṁ, atthipaccayena paccayo.
Phoṭṭhabbāyatanaṁ kāyaviññāṇadhātuyā, dhammānaṁ, atthipaccayena paccayo.
Rūpāyatanaṁ saddāyatanaṁ gandhāyatanaṁ, rasāyatanaṁ phoṭṭhabbāyatanaṁ manodhātuyā, dhammānaṁ, atthipaccayena paccayo.
Yaṁ rūpaṁ nissāya manodhātu ca manoviññāṇadhātu ca vattanti, taṁ rūpaṁ manodhātuyā ca manoviññāṇadhātuyā ca dhammānaṁ, atthipaccayena paccayo.
Samanantaraniruddhā cittacetasikā dhammā, paṭuppannānaṁ cittacetasikānaṁ dhammānaṁ, natthipaccayena paccayo.
Samanantaravigatā cittacetasikā dhammā, paṭuppannānaṁ cittacetasikānaṁ dhammānaṁ, vigatapaccayena paccayo.
Cattāro khandhā arūpino aññamaññaṁ, avigatapaccayena paccayo.
Cattāro mahābhūtā aññamaññaṁ, avigatapaccayena paccayo.
Okkantikkhaṇe nāmarūpaṁ aññamaññaṁ, avigatapaccayena paccayo.
Cittacetasikā dhammā cittasamuṭṭhānānaṁ rūpānaṁ, avigatapaccayena paccayo.
Mahābhūtā upādārūpānaṁ, avigatapaccayena paccayo.
Cakkhāyatanaṁ cakkhuviññāṇadhātuyā dhammānaṁ, avigatapaccayena paccayo.
Sotāyatanaṁ sotaviññāṇadhātuyā dhammānaṁ, avigatapaccayena paccayo.
Ghānāyatanaṁ ghānaviññāṇadhātuyā dhammānaṁ, avigatapaccayena paccayo.
Jivhāyatanaṁ jivhāviññāṇadhātuyā dhammānaṁ, avigatapaccayena paccayo.
Kāyāyatanaṁ kāyaviññāṇadhātuyā dhammānaṁ, avigatapaccayena paccayo.
Rūpāyatanaṁ cakkhuviññāṇadhātuyā, dhammānaṁ, avigatapaccayena paccayo.
Saddāyatanaṁ sotaviññāṇadhātuyā, dhammānaṁ, avigatapaccayena paccayo.
Gandhāyatanaṁ ghānaviññāṇadhātuyā, dhammānaṁ, avigatapaccayena paccayo.
Rasāyatanaṁ jivhāviññāṇadhātuyā, dhammānaṁ, avigatapaccayena paccayo.
Phoṭṭhabbāyatanaṁ kāyaviññāṇadhātuyā, dhammānaṁ, avigatapaccayena paccayo.
Rūpāyatanaṁ saddāyatanaṁ gandhāyatanaṁ, rasāyatanaṁ phoṭṭhabbāyatanaṁ manodhātuyā, dhammānaṁ, avigatapaccayena paccayo.
Yaṁ rūpaṁ nissāya manodhātu ca manoviññāṇadhātu ca vattanti, taṁ rūpaṁ manodhātuyā ca manoviññāṇadhātuyā ca dhammānaṁ, avigatapaccayena paccayo.
Paccayaniddeso Niṭṭhito.